Kategoria: Barriak
Abenduaren 22an aurkeztu dogu Zamudioko Kultur Etxean, Geureak bildumako seigarren alea, Zamudio: bizimodua eta ohiturak liburua. Bertan batu dira egitasmoan parte hartu daben lekukoak, udaleko ordezkariak, Lagatzu Euskera Taldeko kideak eta Labayru Fundaziokoak.
Egitasmo hau 2013an egin zan ikerketa etnografikoaren bigarren emaitza dogu. Bertan hamar kapitulutan banatuta Zamudioko herri ondare etnografikoa eta linguistikoa batu dira. Kasu honetan, kapitulu bakotxaren amaieran laburpena dago, bai gazteleraz eta bai ingelesez.
Lana burutzeko 30 lekuko aukeratu eta 60 orduko bideo-grabazinoak egin ziran herrian. Informanteek emondako testigantzetan oinarrituta dago lan hau, euren bizipenak eta euren oroitzapenak dira liburuaren mamina. Azken baten XX. mendean Zamudiok egin dauan bilakaerea azaltzen da. Tarte horretan gizarteak eta herriak berak aldaketa itzelak ezagutu ditu, eta guzti horreen testigu izan dira gure lekukoak.
Lan honek Zamudioko lehena, oraina eta geroa batzen ditu, herri jakituriaren transmisinoari bidea emonez.
BBK Azoka webgune bat da, BBK Fundazioak azoketako produktoreen lana agirira ekarteko sortua. Hainbat eduki ditu, ekoizleei buruz, azokei buruz, errezetei buruz… Labayru Fundazioan artikuluak sortzen hasi gara nekazaritzako gaiakaz lotuta.
Lehenengo kolaborazinoa Bilboko Santo Tomas azokari buruzkoa izan da. Akaitze Kamiruagak Bilboko tradizino horri buruzko artikulua prestau dau, lehenagoko ohiturak eta oraingo erakusleen lekukotasunak kontuan hartuta. Ikusi hemen artikulua.
Datorren urterako egitekoa izango da hilerik hile artikulu laburrak prestatzea, eta lantzean behin artikulu luze-sakonagoak.
Joan dan barikuan, abenduaren 16an, Berriatuko Kultur Etxeko aretoan, herriko lanbide zaharren gaineko bideoa aurkeztu genduan.
Horretarako lehenengo berriatuarren artean lanbide desbardinetan ibili izan diran lekukoen testigantzak jaso doguz, guztira 30 orduko grabazinoak egin dira. Lekukoen artean errementariak, perratzaileak, arotzak, fundizino lanetan ibilitakoak, idi-probetako arlokoak, joskileak, etab. izan dira. Lanbideok, edo lanbiodetan jarduteko era batzuk behintzat, galtzen doaz. Horregaitik, oso garrantzitsua da oraintsura arte beharren ekin deutsienen lekukotasunak hartzea, informazinoa emoteko protagonisten ahotik zuzen-zuzenean.
Bideoa egitasmo honetako lehenengo emaitza da. Ordu erdiko emonaldian batutako informazinoaren ale hautu batzuk erakutsi dira.
Egitasmo hau Goikolau Kultur Elkarteak sustatutakoa da, Berriatuko Udalaren, Cicautxo enpresaren, eta Bizkaiko Foru Aldundiaren laguntasunagaz.
Bertan alkartu ziran Goikolau Kultur Elkarteko kide ugari, Julene Garate zinegotzia eta Labayru Fundazioaren izenean Adolfo Arejita eta Akaitze Kamiruaga.
Euskal Ikasketen Masterreko bigarren mailan seina eskola-ordu emon dabez Jabier Kalzakortak eta Igone Etxebarriak azaro-abendu bitartean. Masterra Bordeaux Montaigne Unibertsitatearen programa da. Aurelia Arcocha irakaslea arduratzen da maila horretaz eta berak osotu dau programea.
Jabierrek eta Igonek herri literaturari buruzko arloa landu dabe ikasleakaz, lau saiotan, gai honeek aztertu dituela: herri literaturako generoak eta ezaugarriak, amodiozko kantuak Iparraldean, baladak eta mitologia.
Bordeaux Montaigne Unibertsitatearen eta Labayru Fundazioaren arteko lehenengo kolaborazino honen bitartez, erakundeen, lurraldeen eta ikerketa-taldeen artean zubiak eregiteko ahalegina dago.
Bilbo-Abando
Colon de Larreategi 14, 2. esk.48001 Bilbo (Bizkaia)
Tel.: +34 94 443 76 84
labayru@labayru.eus
Derio
Larrauri 1A, 5.a48160 Derio (Bizkaia)
Tel.: +34 94 406 01 71
idazkaritza@labayru.eus
Bilbo-Bolueta
Metroalde eraikinaBilbo-Galdakao errep. 6A
48004 Bilbo (Bizkaia)
Tel.: +34 94 607 72 10
labayru@labayru.eus
