Kategoria: Literatura
Mungiako Udalak urtero eratzen dau Lauaxeta Olerki Lehiaketa, orain dala hamar urtetik hona, herriko poetaren gorazarre legez. Aurten, hamargarren urteurrena ospatzeko, aurreko urteetako olerki irabazleak liburu baten argitaratu ditue. Udalaren argitalpen hori egiten Labayru Fundazioak lagundu deutsie, eta Adolfo Arejita egon da aurkezpen ekitaldian, Ager Izagirre herriko alkateagaz batera.
Urte bakotxeko deialdian, Lauaxetaren olerki bat izan da gaia. Gai horren inguruan olerki bat sortu behar izan dabe lehiaketara etorri diran parte-hartzaileak. Halan osotu da liburua, hamar urtean irabazle bina, guztira hogei poema datoz liburuan. Egileak, ostera, gitxiago dira, batzuk errepikatu egiten diralako. Hona danen izenak: Atotz Goikoetxea, Elena Galzusta, Ibai Ayerza, Ugaitz Agirre, Imanol Sorondo, Ione Gorostarzu, Jabi Santa Cruz, Aitor Albistur, Gotzon Plaza, Antonio Casado eta Mikel Esteban.
Bai poema bakotxari jarritako irudiak bai azalekoa Enrique Morenterenak dira.
Liburua aurkezteaz ganera, aurtengo deialdiko irabazleei saria banatu deutsie ekitaldi berean, Bingen Zupiria Hizkuntza Politika eta Kulturako sailburua bertan dala.
Aurtengo Durangoko Azokan nobedade moduan Laura Urubururen nobela barria erakutsiko dau Labayru Fundazioak.
Amodio-kantu zahar baten kopla guztiz ezagun bat dau izenburutzat, Laura Uruburu Totorikaguena idazleak plazara dakarren elaberri barri honek: Katigatu ninduzun librea nintzena.
Labayru Fundazioak argitaratu dau, euskal narratibari eskainia dauen Urbegi sortan, bildumako hirugarren alea egiten dauela.
300 orrialde beteko elaberria da, zati nagusi bitan banatua, eta zati bakotzaren izenburutzat, euskal errefrau baten osagai bana dituela: Aurreak erakusten du / atzea zelan ibili. Narrazinoa zortzi kapitulutan atalkaturik dago, bakotxaren izenburutzat aste-egun jarraikoen izenak dituela: igandetik igandera.
Amodioa, elaberri honetan, ez da neska-mutil edo andra-gizonen artekoa, ama-semeen artekoa baino. Umetxo baten heriotzagaz hasten da istorioa, eta gertaera triste eta lazgarri horrek, amaren, Elba eleberriko protagonistaren bizitza erabat asaldarazten dau, eta bihotza eta emozinoen mundua astintzen deutsoz era bortitz baten. Noraezean ikusten dau bere burua herstura eta egonezinean; ahalmenik gabe modu galduan, zorigaitzezko zirrara eta hunkipenen ekatxean. (gehiago…)
Durangoko Liburu eta Disko Azokan urtean zehar Labayru Fundazioak argitaratu dituan liburu eta aldizkariak izango ditugu ikusgai eta salgai.
Literaturan, Jabier Kalzakortaren Euskal baladak liburu bikotxagaz batera, Bitañoren narrazinoak batzen dituena, Mugarrapetik kontu kontari izenburuagaz. Idatz & Mintz aldizkariaren 64. zenbakia, separata eta guzti, Marcel Schwoben Umeen gurutzada.
Jarein bilduman Jose Mari Rementeriak ondutako Euskerazko dotrinak izeneko liburua, katalogo antzera atondua.
Gurean zer berri? saileko bigarren aleak, etnografiako gai laburren bilduma dakar. Eta Euskerazaleak 50 urte 1967-2017 liburuan alkartearen berrogeta hamar urteko ibilbidearen laburpena jasoten da.
Bizkaierazko aditza. Hirugarrena euskera ikasten dabilzanentzako ariketa-liburua da, aurretik egindako beste biren jarraipen modura datorrena.
Aurten be Begoñazpi Ikastolan Eleketan programa beteko dogu, 3 urteko umeen gelakoakaz hasi eta DBH2ko ikasleenganaino, maila guztietan hiruna tailer egingo ditugu ikasturtean zehar. Guztira 33 tailer, hamaika hiruhileko bakotxean, eta maila bakotxean ehun bat ikasle batez beste.
Eleketan programako tailerrak era guztietako gaiak lantzen dira euskal kulturea, lanbide zaharrak, Euskal Herriaren historia, euskal gastronomia…, beti be irakasleekaz adostuta eta ikasleen maila eta adinera egokituta, ordu eta erdiko saioetan
Hiruhileko honetan: Haur Hezkuntzan letxuga landatzen, betiko olgetak eta taloa egiten ikasi; Lehen Hezkuntzan Gabonetako tradizinoak, artzaintzaren eta burdinoletako ofizioak, herri kirolak, Euskal Herriko txoko eta ohiturak, ipuina asmau; eta DBHn gerraren memoria eta mendizaletasunari buruzkoak.
Programa honen helburua da euskal hizkuntza eta kultura modu ludiko baten ezagutzea zaletasuna eta enpatia eragiteko.
Bilbo-Abando
Colon de Larreategi 14, 2. esk.48001 Bilbo (Bizkaia)
Tel.: +34 94 443 76 84
labayru@labayru.eus
Derio
Larrauri 1A, 5.a48160 Derio (Bizkaia)
Tel.: +34 94 406 01 71
idazkaritza@labayru.eus
Bilbo-Bolueta
Metroalde eraikinaBilbo-Galdakao errep. 6A
48004 Bilbo (Bizkaia)
Tel.: +34 94 607 72 10
labayru@labayru.eus
