Labayru Gaur

Esanetik Idatzira II. Berba eta hizkiak gramatika goruan izenburuagaz, gramatikako gaiak lantzen dituan liburua dakar bigarrenez Adolfo Arejitak, Ana Oar-Artetaren laguntasunagaz.

Aurretik holako beste bat atera zan 2019an, Gramatika-Estiloen zabuan azpi-izenburuagaz. Oraingoan 40 gai hartzen ditu guztira liburuak, hainbat gramatika-edukiren ganean. Hamar atal nagusitan antolatuta dagoz artikuluok, gramatika-arlo jakinei buruz. Bakotxean hiru-sei gai bitartean landu dira.

Artikuluok euskerea zuzen erabiltera begira eginda dagoz, baina beti aldaerak, forma ugaritasuna, jatortasuna gogoan hartuta. Batzuetan igarri barik isurtzen jakuz forma ez egokiak; beste batzuetan berba edo esamodu bakarrera mugatzen gara, kontuan hartu barik ahoz erabilten diran pareko oso egokiak. Hori dana dago lan honen azpian.

Horretarako, hiztunen ekarpenak ezinbestekoak izan dira, bakotxak zer zelan esaten dauen, hiztun ziurren ahotan zelan esaten diran gauzak, oso garrantzitsua izan da, adibideak emon eta azalpenak garatu orduan. Horrez ganera, idazleen lekukotasunak be ezinbestekoak dira. Horregaitik, azalpen guztiak adibidez ondo-ondo horniduta datoz.

Lan hau Bizkai edo sartalde euskera era landuan erabili gura danean zein ereduri jarraitu erakusteko gogoan eginda dago. Norentzat da orduan? Irakasle, itzultzaile, hedabideetako profesional zein edozein arlotan euskera idatziz erabili behar daben guztientzat. Goi-mailako adituentzat baino gehiago, hizkuntza erabili egin behar daben hiztun arruntentzat.