Labayru Gaur

Joan dan urtean mendeurrena ospatu eban Anuario de Eusko Folklore/Eusko Folklore Urtekaria aldizkariak, 1921ean argitaratzen hasi zana José Miguel de Barandiaranen bultzadaz. Hori dala-ta, ale berezia prestau dabe, bai ehun urteko ibilbideari begiratua egiteko, bai etorkizunerako oinarriak finkatzeko be.

Ale berezi honek aldizkariaren 55. zenbakia egiten dau. Abel Ariznabarreta dau orain zuzendari, eta haren hitzaurreak zabaltzen dau artikulu-katea. Horren ostean lurraldez lurralde hainbat erakundek etnografia arloan jorratutako lanak, egindako bidea eta etorkizunera begira jakintzagai horretan ze ikuspegi daukien azaldu dabe.

Hor da Labayru Fundazioaren ikuspegia be, Igone Etxebarriak eta Akaitze Kamiruagak idatzitako artikuluan. Izan be, Barandiaranek zabaldutako bidea Labayruren ibilbidean eta garapenean oinarri sendoa eta zutabe arteza izan da. Etnografian ez eze, hizkuntzan eta literaturan egindako lanetan be ikuspegi bera topauko dogu Labayruren barruan.

Euskal Herriko beste lurraldeetan, eta bakotxeko erakunde ezbardinetan, Barandiaranen eskoleak egindako eragina eta etnografiaren egoera gaur egun zehatz azalduta dago. Espilu interesgarria da aldizkaria argitaratzen hasi zanetik mende bat igaro danean, etnografia non dagoan ikusteko, eta ze etorkizun ikusten jakon be igarteko.

Aldizkaria osotzeko, Antzasti (Dima) eta Artziniegako Museo etnografikoari buruzko artikuluak datoz.