Labayru Gaur

Urriaren 15ean Gotzon Garitaonandiaren heriotzaren 50. urteurrena bete zan. Hori dala-ta, hurrengo egunean, omenaldia egin jakon Bermeoko Nestor Basterretxea aretoan; omenaldi xumea izan zan baina benetan hunkigarria. Ekitaldia Sukarri kultur-taldeak, Gotzon Garitaonandia euskaltegiak eta Bermeoko Euskera Taldeak antolatu eben.

Kontxi Gabantxoren gidaritzapean egin zan saioa. Dantzariak egindako agurraren ostean, lehenengo, Gotzonen lobea dan Akaitze Kamiruagak egin eban abade urduliztarraren idazle-ibilbidearen errepasoa. Gero Xabier Amuriza bertsolari eta idazleak, alkarregaz bizi izandako Derioko seminarioko denporetako pasadizuak eta bizipenak kontau ebazan. Amaitzeko, Ana Tere Bengoetxeak, Sukarri taldeko partaide lez, Gotzonek Mañun eta Bermeon euskeraren eta euskal kulturaren alde egindako lana nabarmendu eban.

Tarteka, Sukarri Taldekoek eta bertara parajetu ziran guztiek Gotzonek sortu edo euskeratutako kantuak abestu ebezan.

Gotzon Garitaonandia 1936an jaio zanUrdulizen. 1963an abade egin eta Mañuko parrokoa izendatu eben. 1960ko hamarkadan makinatxu bat artikulu idatzi ebazan Anaitasuna, Karmel, Olerti, Zeruko Argia eta Agur aldizkarietan. 1967an Balendin Uriona txirrindulariari buruzko biografia be argitaratu eban, horixe izan zan bere lanik garrantzitsuena.