Labayru Gaur

Karmelo Etxenagusia zanaren lobeak, Karmele Etxenagusiak, Labayrura ekarri ditu osabearen materialak. Etxean euki dituan hainbat karpeta, papel, grabazino, kantu… Labayruko Euskal Bibliotekan hobeto egongo dirala-ta, bertara ekarri ditu Mikel semeagaz batera.

Karmelo Labayruren sorreran zutabe handia izan zan, Derioko Udako Ikastaroaren arimetako bat, irakasle paregabea, literaturzalea, hainbat materialen egilea… Gotzain laguntzaile izan eta gero, hainbat gauza egiteko gogoa eukan, baina ezertarako asti barik joan jakun. Lanen bat hasita itxi eban, beste material asko batuta baina ordenau barik, asmoak.

Haren hiru lobek banatu ebezan osabearen ondasunak. Karmelek orain Labayrura ekarri ditu gure arloagaz zerikusia euki leikien materialak. Hainbat karpeta eta kutxa dira. Danak astiro-astiro begiratu beharko dira, katalogau eta ondo gorde, bihar-etzian konsultetako moduan egon daitezan.