Labayru Gaur

Larrabetzuko baserriak eta etxeak – Izena eta izana izeneko liburua aurkeztu dogu Larrabetzun 2023ko martiaren 17an.

Baserria euskal kulturaren zutabe eta ardatzetako bat da, euskereagaz batera: oinarrizko gizarte-erakundea da, bizimodua eta lana batzen dituana, eta mendez mende personei identidadea emon deutsiena.

Baserrien jatorriko izendapenak gaur egun auzo-izen edo abizen bihurtuta dagoz. Baserriak emoten deusku izena. Horregaitik dauka liburu-bilduma honek ‘Izena eta izana’ azpititulua. Xalbador bertsolariak ‘Sortetxeari’ egindako bertsoetan esaten dau: ‘Munduko leku maitena, zuri zor dautzut naizena: izana eta izena’.

Aurkezpenera herritar asko batu ziran. Ekitaldian, Igor Elordui euskara zinegotziak, alkatearen berbak ekarri zituan, toponimiak herriari buruzko informazino handia emoten dauela gogoratuz.

Igone Etxebarria Labayru Fundazioko zuzendariak baserriak identidadea emoten deuskula gogoratu eban, eta era honetako lanen bitartez gure ondarea ezagutzearen eta hurrengo belaunaldiei helaraztearen garrantzia azpimarratu eban.

Ziortza Artabe Labayru Fundazioko teknikariak, eta lanaren egile-taldearen izenean, erabilitako metodologia, kontsultautako iturriak, toponimoen gaineko ondorio batzuk, eta baserrien tipologia nagusia azaldu zituan.